ဘာသာရပ်ရွေးချယ်မှု မှန်ကန်ရန်လိုအပ်

စင်ကာပူနိုင်ငံတွင် ပညာသင်ယူလိုမည့် မြန်မာလူငယ်များအနေဖြင့် မိမိအမှန်တကယ် စိတ်ဝင်စားသည့် ဘာသာရပ်ကိုရွေးချယ်ရာတွင် အားနည်းချက်များ ရှိနေသေးကြောင်း ပညာရေးဝန်ဆောင်မှု လုပ်ငန်းရှင်များက သုံးသပ်သည်။

“ စင်ကာပူကျောင်း သွားတက်ချင်တယ်ဆိုပြီး ရောက်လာတဲ့ကျောင်းသားတွေကို မေးလိုက်တိုင်း သူတို့ ကိုယ်တိုင် ဘာကို စိတ်ဝင်စားမှန်း မသိဘဲသွားချင်ကြတာတွေက များတယ်” ဟု ‘မြန်မာဆာ့ခ်ျ နိုင်ငံတကာပညာရေး ၀န်ဆောင်မှုကုမ္ပဏီ’ အုပ်ချုပ်မှု ဒါရိုက်တာ ဒေါ်စုစုလှိုင်က ပြောသည်။“ စင်ကာပူမှာ သွားပြီးကျောင်းတက်ချင်တဲ့ ကျောင်းသားတွေကလည်း တဖြည်းဖြည်းများလာပါတယ်” ဟု ၎င်းကပြောသည်။

“ ကျောင်းသားတွေအနေနဲ့က ကိုယ်စိတ်ဝင်စားတဲ့ ဘာသာရပ်က ဘာလဲ၊ ကိုယ့်ရည်ရွယ်ချက်ကဘာလဲ သေသေချာချာ သိထားဖို့လိုတယ်။” “ ကိုယ့်သူငယ်ချင်းက ဒါတက်လို့လိုက်တက်တာတို့၊ ကိုယ့်သူငယ်ချင်းတွေ သွားလို့ သွားတာဆိုတာ မဖြစ်သင့် ပါဘူး” ဟု ၎င်းကဆက်ပြောသည်။” စင်ကာပူတွင် ဟိုတယ်နှင့်ခရီးသွားလုပ်ငန်း၊ သတင်းနှင့် နည်းပညာ၊ စာရင်းအင်းစသည့် ကဏ္ဍများ၌ လုပ်သား လိုအပ်ချက်များ ရှိနေပြီး မြန်မာကျောင်းသား များအဖို့ ယင်းလိုအပ်ချက်များနှင့် မိမိတို့ဝါသနာပါသည်များကို သေချာလေ့လာပြီး တက်ရောက်သင့်ကြောင်း ဒေါ်စုစုလှိုင် က အကြံပြုသည်။ မြန်မာကျောင်းသား အများစုမှာမိဘများအပေါ် မှီခိုကြီးပြင်းလာရသဖြင့် နိုင်ငံရပ်ခြား တွင် ပညာသင်ကြားမည်ဆိုပါက အားလုံးကိုယ့်ခြေထောက်ပေါ် ကိုယ်ရပ်ရမည် ဆိုသည့်အချက်ကို ထည့်သွင်းစဉ်းစား ရန် လိုအပ်ကြောင်း ၎င်းကသတိပေးသည်။

‘ အမ်-အေ-အေ သင်တန်းစင်တာ၏ အထွေထွေမန်နေဂျာ ဒေါ်ရီရီခိုင်စံက “ ကျောင်းသားတွေအနေနဲ့ စင်ကာပူမှာ ကျောင်းတက်ချင်တာပဲသိတယ်။ ဘယ်ဘာသာရပ်တွေ တက်ရမယ်၊ ဘယ်လိုအခွင့်အလမ်းတွေ ရှိတယ်ဆိုတာ မသိကြဘူး” ’ ဟုပြောသည်။ “စင်ကာပူနိုင်ငံ အနေနဲ့ ခုလက်ရှိလူဦးရေထက် နှစ်သန်းလောက်ကို တိုးဖို့မှန်းထားတယ်။ အဲဒီအတွက်ကြောင့် အလုပ်အကိုင် အခွင့်အလမ်းက ပိုကောင်းလာနိုင်တယ်။ စင်ကာပူနိုင်ငံရဲ့ ပညာရေးကလည်း အာရှမှာ အကောင်းဆုံးလို့ ပြောလို့ရတဲ့အနေအထားမှာ ရှိတယ်။ နိုင်ငံကြီးတွေကို ဆက်ပြီးသွား ကြရင်လည်း ပေါင်းကူးတံတားတစ်ခုလိုပဲ။ အဲဒီအတွက်ကြောင့်လည်း စင်ကာပူသွားတာ အရမ်းများပါတယ်” ဟု ၎င်းကဆက်ပြောသည်။

Read More >>